Faida ya funga ya Ramadhan kitiba

“(Mfunge) siku maalumu za kuhisabika. Na atakaye kuwa miongoni mwenu mgonjwa au yumo safarini basi atimize hesabu katika siku nyengine. Na wale wasioweza, watoe fidiya kwa kumlisha masikini. Na atakayefanya wema kwa kujitolea, basi ni bora kwake. Na mkifunga ni bora kwenu, kama mnajua.” [Quran 2:184].

baada ya siku kadhaa za funga ya Ramadhan, homoni kadhaa za mwili kama vile endorphins huanza kuongezeka ndani ya damu na hivyo kuimarisha afya ya akili.

Kuhusu hitimisho la Aya hiyo, Sayyid Qutb [Rejea, tafsiri yake: ‘Fii dhwilaalil-Qur’an] amesema: “Pamoja na kutoa elimu na mafunzo ya utayari utakaowafanya Waislamu kufanya juhudi ya kufunga Ramadhan, pia inatubainishia kwa uwazi kabisa kuwa funga hii ya Ramadhan ina faida kubwa kiafya/kitiba.”

Kujadili faida za kiafya za funga, hususan hii ya Ramadhan tunayoendelea nayo hivi sasa, ndilo hasa kusudio la makala hii.

Kifiziolojia, mwili huishiwa glukosi masaa takribani nane au zaidi baada ya mlo wa mwisho. Glukosi ni sukari ya mwisho inayopatikana baada ya mmeng’enyo wa vyakula vya kabohaidreti. Sukari hii ndiyo inayotegemewa na mwili kuzalisha nishati.

Glukosi ya mwili ambayo huhifadhiwa kwenye maini na misuli, kama nilivyodokeza, ndiyo chanzo kikuu cha nguvu/nishati ya mwili. Baadae, wakati wa funga, hazina ya glukosi ikiwa imeisha, mafuta hugeuka kuwa chanzo mbadala cha pili cha nguvu/nishati ya mwili.

Ni wakati mwili umekosa chakula kwa siku nyingi, mpaka wiki mathalan, ndiyo mwili huigeukia protini kwa ajili ya kuzalisha nishati. Muda huu, glukosi na mafuta huwa tayari vimeisha. Hii ndiyo huitwa janga la njaa, na kamwe siyo hali salama kabisa kwa afya ya mwili.

Kwa kuwa, funga ya Ramadhan huanzia unapobainika weupe wa Alfajiri katika weusi wa usiku (saa 12 Alfajiri) – kama ilivyobainishwa kupitia Qur’an [2:187] mpaka Jua linapozama (saa 12 jioni); basi unapofika muda wa kufuturu, mwili hupata nafasi ya kufidia hiyo glukosi na mafuta yaliyotumika wakati mwili ulipoishiwa kuwa glukosi (kuanzia saa 7-12).

Hii hutoa nafasi kwa mwili kuhama taratibu kutoka kwenye kutumia glukosi kama chanzo kikuu cha nguvu/nishati, kwenda kwenye kutumia mafuta kama chanzo mbadala cha pili cha nguvu/nishati; na hivyo kuuzuia mwili kufika kwenye uvunjwaji wa protini (chanzo mbadala cha tatu cha nishati ya mwili). Uvunjaji wa protini ungepelekea kutokea janga la njaa.

Matumizi/uvunjwaji wa mafuta kama chanzo mbadala cha pili cha kuzalisha nguvu/nishati una faida kadhaa, ikiwemo kupunguza uzito wa mwili, kuilinda misuli na kupunguza sumu mwilini ambazo huhifandhiwa kwenye mafuta. Kadhalika, baada ya siku 29/30 za funga ya Ramadhan, hata lehemu (cholesterol) ya mwili huwa imepungua.

Kwa nyongeza, kupungua kwa uzito hupelekea usimamizi mzuri wa kiwango cha sukari ya mwili (hususan kwa wenye kisukari). Kuongezeka kwa uzito humfanya mtu awe kwenye hatari ya kuugua kisukari cha aina ya pili (type 2 diabetes) ambacho hutokana na kupotea kwa uwezo wa kawaida wa tishu (seli) za mwili kuchukua homoni ya insulini inayosimamia kiwango cha sukari mwilini, au ukinzani wa insulini. Vile vile, kupungua kwa uzito hupelekea kupungua kwa shinikizo la damu.

Katika faida zaidi, baada ya siku kadhaa za funga ya Ramadhan, homoni kadhaa za mwili kama vile endorphins huanza kuongezeka ndani ya damu na hivyo kuimarisha afya ya akili. Matokeo yake,
Muislamu hupata amani ya moyo, utulivu, furaha, upendo, kujali/kuthamini n.k

http://bit.ly/2WVyiGW

Mpangilio mzuri wa futari baada ya kufunga

Mfungo wa Ramadhan ni moja kati ya nguzo tano zinazokamilisha Uislamu. Kwa watu wengi, imezoeleka kuwa wakati wa Ramadhan ni muda wa kufurahia na kupika mapishi mengi kwa wakati mmoja ili kufidia njaa ya kutwa nzima.

Jambo jengine la kushangaza ni kuwa, matarajio ya kufunga ni kuona miili yetu ikipoteza kiasi kidogo cha uzito, lakini hali imekua kinyume. Wengi miongoni mwa wafungaji, huongezeka uzito maradufu kutokana na mpangilio mbaya wa chakula ambapo kiasi kikubwa cha chakula hiki huliwa kwa wakati mmoja na mwishowe kusababisha athari mbalimbali katika mwili. Ndugu mfungaji, katika makala hii tutajionea namna ya kufuturu na kuweka uwiano mzuri wa futari baada ya kufunga.

Zingatia namna nzuri ya kufungua
Bila shaka, namna nzuri ya kufutari inaanza na kitu cha kwanza cha kukatia funga. Kama ilivyofundishwa katika dini, namna nzuri ya kufungua ni kuanza na tende au maji. Mbali na kuwa ufunguaji wa namna hii huamsha tumbo na mfumo wa chakula kwa ujumla, lakini pia ufunguaji wa namna hii ni mafundisho tuliyofundishwa na Mtume (rehema za Allah na amani zimshukie).

Punguza idadi ya mapishi
Katika kipindi hiki cha mfungo, ni jambo la kawaida sana kuona idadi kubwa ya mapishi yakipikwa ilimradi kufurahisha nafsi wakati wa futari.

Jambo hili ndiyo limekua chanzo kikubwa cha watu kula sana kiasi cha kupelekea madhara katika mwili. Pia mapishi haya mara nyingi hujumuisha idadi kubwa ya vyakula tofauti vyenye asili moja, hususan wanga. Mfano, futari inayojumuisha muhogo, viazi, uji wa ugali na chapati inaweza kuonekana ni futari ya vyakula tofauti lakini vyote ni vyakula vya asili moja yaani vyakula vya wanga.

Kunywa maji ya kutosha
Ni jambo muhimu sana kunywa maji ya kutosha baada ya kufungua ili kurudisha kiasi cha maji kilichopotea wakati mchana. Pia namna nzuri ya kunywa maji ni kula vyakula ambavyo vina asili ya maji mfano supu za mboga mboga au nyama, matunda kama vile machungwa, matikiti na matango. Pia, matunda haya yanaweza kukamuliwa na kutengenezwa juisi nyepesi.

Ndugu msomaji, jambo jingine la kujua ni kuwa unywaji wa maji mengi sana (maji halisi) huweza kuzimua chumvi chumvi na viinilishe vingine katika mwili hivyo kupelekea hali ya kulevya kwa maji au sumu ya maji (water intoxication / poisoning).

Ongeza mboga mboga na matunda
Ni jambo la nadra sana kuona mboga mboga na matunda vikitumika kama futari. Ulaji wa mboga mboga na matunda hunufaisha sana mwili kwa kuupatia viinilishe vingi ambavyo vina faida kubwa sana katika mwili hususan wakati wa kufunga. Pia faida nyingine ni kuwa, shibe inayotokana na ulaji wa vitu hivi huwa haipelekei athari kama vile kuvimbiwa, uvivu au kusinzia kinyume na shibe inayotokana na vyakula vya wanga ambayo mara nyingi huleta athari hizi.

Punguza vyakula vya wanga
Kama tulivyojionea hapo juu ya kuwa vyakula vya wanga hupelekea kuvimbiwa, uvivu na kusinzia, athari ambazo ndiyo chanzo kikubwa cha watu kushindwa kufanya ibada ya tarawehe na nyinginezo. Si hayo tu, pia ulaji wa vyakula vya wanga kupita kiasi ndiyo chanzo kikubwa cha kuongezeka uzito na kuongeza hatari ya kupata magonjwa kama vile shinikizo la damu, kiharusi na magonjwa ya moyo.

Namna ya kufuturu
Ndugu Muislamu, futari nzuri si wingi wa vyakula bali futari nzuri ni ile inayozingatia kanuni za mlo kamili. Si busara kupika vyakula vikuu zaidi ya aina moja yaani haifai kupika vyakula kama vile viazi, mihogo, magimbi, chapati au tambi kwa wakati mmoja bali unaweza chagua aina moja tu na kuongeza vyakula vya aina nyingine kama vile maharage au kunde au mbaazi au choroko na pia kuongeza kwa wingi mboga
mboga na matunda na vyakula vingine kama samaki, mayai au kuku.

http://bit.ly/2LW4rNN